رد الدكتور محمد فتحي درويش على مقولة الحليب فيه سم قاتل

مقدمة

السلام عليكم ورحمه الله، مرحبا بكم في حلقه جديده..

احذر اللبن فيه سم قاتل!! انتشرت هذه المقولة في الفترة الأخيرة، بعد الفحص الطبي على المريض والتأكد من التشخيص، و ان المريض يعانى من نقص شديد في نسبة الكالسيوم سواء الكالسيوم المتأين اللي هو النشط جوه العظام،

او الكالسيوم التوتال اللي هو في الدم، و بناء على ذلك يتم وصف العلاج للمريض.

العلاج يتكون من عنصر ثلاثي، العنصر الأول: عنصر دوائي، العنصر الثاني: عنصر غذائي، العنصر الثالث: ممارسه الرياضة،

وعند وصف العنصر الغذائي والتأكيد على تناول المريض ل كميه مناسبه من اللبن يوميا، يقول المريض بصوت مرتفع … بصوت غاضب! احذر يا دكتور .. اللبن فيه سم قاتل!!

ومع انتشار هذه المقولة و تكرارها اكثر من مره ويرجع ذلك الى فيديو شهير على قناه اليوتيوب

نتيجة لذلك كان لابد من الرجوع الى الفيديو والاطلاع على المصادر، وثم توضيح الأمور للساده المشاهدين، والساده المتابعين لي على قناه اليوتيوب، او الزائرين لي في العيادة.

والرد كما قال الطبيب، هو يقول ان اللبن فيه سم قاتل، بدليل علمي ودليل ديني و دليل عقلي!! وانا ان شاء الله هرد برده رد علمي، ورد عقلي، ورد ديني بناء على كلام الطبيب.

الرد العقلي على مقولة هل الحليب سم قاتل

أولا الرد العقلي: النقطة الأولى- أشار الطبيب ان اللبن فيه سم قاتل ما ينفعش حيوان يشرب لبن حيوان اخر وبالتالي ما ينفعش الانسان يشرب لبن حيوان اخر!! وهذا الكلام غير منطقي اطلاقا.

أولا ينفع الحيوان يشرب لبن حيوان ثاني، مثلا القطه: لو جبنا لبن جاموسي وشربناه للقطة، مش هيحصل لها أي مشاكل، وكذلك الحصان وغيرهم، فهذا كلام غير منطقي اطلاقا..! وقاعده غير صحيحه ولا يستند اليها من الأساس.

النقطة الثانية- يقول: ربنا خلق اللبن في صدر أم الحيوان عشان يكفي الحيوان،

• من المعروف علميا ان صغير البقرة او الجاموس، يستهلك حوالي من ثلاثة ونصف لتر لسبعه لتر يوميا، والأم تنتج حوالي 25 لتر يوميا!! فبالتالي الانسان لا يستهلك لبن صغير الجاموس كما قال هذا الطبيب،

بما ان صغير الجاموس بيستهلك 7.5 لتر من 25 لتر يوميا!.

بخلاف مثلا لبن الحمار، الحمار بينتج لبن يكفي صغيره بالضبط، فبالتالي لبن الحمار غالي جدا … وهناك بعض الأطباء بيشتروه، عشان يقوموا تجارب علميه في المختبرات العلمية، فلما يجوا يشتروه، بيكون غالى جدا !! لأنه هو لبن نادر بخلاف لبن الجاموس لأنه بينتج كميه كبيره زائده عن حاجه صغيره.

• صغير الجاموس يتم فطامه عند 15 أسبوع وامه تدر لبن لمده 300 يوم او اكثر!!

لذلك قال الله تعالى ولكم فيها منافع ومشارب افلا تشكرون

نقطه برده مهمه اثارها الطبيب في الفيديو الشهير، ان اللبن فيه سم قاتل!! بيقول ان لبن الجاموس لما اتبستر وشربوه لصغير الجاموس مات!

الكلام ده حتى لو هو صح زي ما هو قال لم يمت عشان اللبن متبستر، مات لان الصغير اعتمد اعتماد كلي على اللبن المبستر،

واللبن المبستر يفقد الكثير من قيمته الغذائية، يعني الانسان لما يشرب لبن مبستر يفقد الكثير من قيمته الغذائية بيعوضوا عن طريق الاكل والشرب، بياكل لحوم بياكل خضروات بياكل فواكه، فبيعوض القيمة الغذائية، بخلاف رضيع الجاموس .. لما احنا ادينا له لبن مبستر فقط ، فقد قيمته الغذائية وهو ما بياكلش حاجه خالص غير اللبن فقط، وهذا يعني أنه لازم يموت… لان العناصر الغذائية اللي دخلت جسمه قليله جدا فبالتالي هو مات لان هذا هو الغذاء الأساسي والوحيد له.

كل الأديان السماوية ذكرت اللبن بكل خير واثنت عليه خيرا،

على سبيل المثال الاسلام والنصرانية واليهودية، وطبعا احنا عارفين الآيات والاحاديث في القرآن والسنه كثيره، والتي توضح قيمة اللبن والحرص على تناوله. قال تعالى في سورة النحل:

﴿ وَإِنَّ لَكُمْ فِي الْأَنْعَامِ لَعِبْرَةً ۖ نُّسْقِيكُم مِّمَّا فِي بُطُونِهِ مِن بَيْنِ فَرْثٍ وَدَمٍ لَّبَنًا خَالِصًا سَائِغًا لِّلشَّارِبِينَ﴾
[ النحل: 66]

سورة : النحل – An-Naḥl – الجزء : ( 14 )  –  الصفحة: ( 274 )

في آيه تانية، ربنا بيصف الجنه وما فيها من اوصاف جميله، وما فيها من اغراءات، في سوره محمد ايه 55 يقول الله تعالى: وانهار من لبن لم يتغير طعمه

وانهار من لبن لم يتغير طعمه!! يعني ربنا جعل من وصف الجنه ونعيمها اللبن!

النبي صلى الله عليه وسلم، في رحله الاسراء والمعراج.. عرض عليه قدحين قدح فيه لبن وقدح فيه خمر، فإختار النبي صلى الله عليه وسلم القدح الذي فيه لبن!!

فقال له جبريل الحمد لله الذي هداك الى الفطره لو اخذت الخمر غوت امتك

حتى دعاء الاكل امرنا الرسول ان نقول عندكل طعام اللهم بارك لنا فيما رزقتنا وزدنا خيرا منه،

الا اللبن!! كان رسول الله صلى الله عليه وسلم يقول اللهم بارك لنا فيما رزقتنا وزدنا منه

لانه لا يوجد هناك خير من اللبن.

الردود العلمية على مقولة هل الحليب سم قاتل

الردود العلميه على هذا الفيديو، وعلى مقوله ان اللبن فيه سم قاتل،،،

المقوله الاولى؛ اصل اللبن كان زمان حلو و دلوقت ما عادش حلو،

اللحوم زمان كانت حلوه و دلوقت برده ممكن تبقي متهرمنه، الفواكه زمان كانت حلوه و دلوقت برده ممكن تبقي متهرمنه، وكذلك الخضروات ووو إلخ .

الرد على المقولة الأولى: قبل كل شيء ، هذه ليست قاعده، الاصل اننا بندور على الحاجه المميزه العضويه ونشتريها،

مش معنى ان اللبن ممكن يكون عليه اضافات تؤدي الى مشاكل، ان احنا نبعد عنه!!

كلنا دلوقت عندنا جيرانا وعندنا الناس اللي في البلد،

ممكن تجيب لنا لبن صافي ولبن عارفين مصدره كويس بدون اي اضرار، فمش معنى ان ممكن اللبن يكون عليه اضافات ان احنا مانشربوش،، هذه قاعده ليست صحيحه.

النقطه الثانيه: علميا والتي انتشرت في هذا الفيديو، واللي الدكتور اتكلم عليها بوضوح واكد على خطورتها، ان اللبن شديد الحموضه!!

الرد عليها: اولا هذه النقطه علميا خاطئه ميه في الميه،

احنا كلنا عارفين ان درجه الحموضه تبدا من 1 الى 14 درجه، ورقم سبعه يعني التعادل، فوق الرقم سبعة يبقى قلوي وتحت الرقم سبعة يبقى حمضي،

درجه حموضه اللبن

كم درجه حموضه اللبن ؟ علميا من سته وسبعه من عشره إلى سته وتسعه من عشره، يعني ليست حامضيه اطلاقا،

بل متعادله وقريبه جدا من درجه البي اتش، وهي درجه المعده اثناء هضم الطعام اللي هي 7،

ولو افترضنا يعني نفترض فعلا ان اللبن حامضي،!! طب هنقول ايه بقى على الليمون؟! هنقول ايه على البرتقال؟! هنقول ايه على الطماطم او غيرها من الاطعمه الحامضيه؟!

اذا كان اللبن حامضي، وبلاش نشربه عشان هيئذي المعده،

يبقى بالتالي الكثير من الفواكه اللي هي اكثر حامضيه من اللبن الاصل ان احنا نبعد عنها..!

النقطه الثالثه: الدراسه اللي استند عليها الدكتور، وقد رجعت شخصيا إي الدراسه اللي الدكتور مستند عليها،

وهي دراسه سويسريه نشرت في جريده لايف ساينس يوم 28 اكتوبر 2014

الدراسه اتعملت على 61000 امراه من سن 39 سنه الى سن 74 سنه،

واتعملت على 45 الف رجل من سن حوالي 45 سنه الى 79 سنه الدراسه، استمرت 20 سنه،

قامو بتقسيم الاشخاص دول لمجموعتين: مجموعه بتشرب يوميا ثلاث اكواب لبن، ومجموعه بتشرب يوميا كوب واحد لبن،

وجدوا ان نسبه الوفيات في المجموعه اللي بتشرب ثلاث اكواب لبن،

زياده واحد وتسعه من عشره مرة عن المجموعه اللي بتشرب كوب واحد لبن، الضعف يعني،!

طيب نرد علي الدراسه دي: اولا الدراسه بتقارن بين تناول اللبن بشكل يومي، يعني مش بتقارن بين ناس شربوا لبن وناس لم يشربوا لبن،

لأ هي تقارن بين مجموعه تناولت اللبن ثلاث اكواب يوميا، ومجموعه تناولت اللبن كوب واحد يوميا،

فبالتالي الدراسه لا تمنع شرب اللبن، ولكن تحذر فقط من الافراط في شرب اللبن، دي النقطه الاولى.

طب النقطه الثانيه: نسبة الوفيات في المجموعه اللي شربت ثلاث اكواب لبن لمده 20 سنه! زادت واحد وتسعه من عشره، عن المجموعه اللي شربت كوب واحد لبن لمده 20 سنه، ورجعت السبب لايه؟ لزياده نسبه الجلاكتوز وتأكسده في الجسم،

بيعمل زياده التهابات، الالتهابات تؤدي الى قله الحركه، قله الحركه تؤدي الى هشاشه العظام، هشاشه العظام تؤدي الى الكسور، الكسور في الاماكن الحيويه مثل مفصل الفخذ يؤدي الى الوفاه.!

النقطه اللي بعد كده اللي انا عايز ارد بها ان الدراسه، نفس الدراسه!!

بتشجع وتدعو الناس إلى تناول منتجات الالبان بخلاف اللبن، يعني بتقول لك كل جبنه كل زبادي زي ما انت عاوز ، بس حاول تقلل من اللبن.

الدراسه كمان بتقول لك ايه؟! بتقول لك لا انت عاوز تشرب لبن، وعاوز تشرب لبن بكميات، لكن بس بتنصح عشان تقل مضاعفات اللبن نتناول مضادات الاكسده…!

احنا عاوزين نقلل مضاعفات اللبن اللي بتحصل، اللي بيرجعوها في الدراسه لزياده نسبه الجلاكتوز،

تناول مضادات الاكسده، فبالتالي هتخلي نسبه الجلاكتوز ضعيفه، فمش هيحصل الاعراض اللي كانت بتحصل من زياده الالتهابات.

كاتب الدراسه ذات نفسه اللي هو الدكتور اني هاردينج بيقول اي بقى؟!

بيقول يا جماعه ما حدش يغير اسلوب حياته على هذه الدراسه،! لان الدراسه تمت بملاحظه وليست بالادله الاكلينيكيه … !

يعني جابوا المجموعتين وقعدو يسجلوا بس نسبه الوفيات من غير ما يرجعوا لسبب الوفيات نفسه ايه!

بمعنى آخر إن ممكن الناس اللي ماتت دي، ناس ماتت لان عمرها كبير ،

اكثر من نصفهم فوق ال 60 سنه، ماتت لان ممكن يبقى عندهم امراض ثانيه، فشل كلوي او فشل في الكبد، او مشكله في الضغط او مشكله في السكر، او مشكله في القلب او غيره، من الامراض او حتى موت طبيعي …!

الراجل عمل الدراسه وبيقول نتائج الدراسه تمت بناء على ملاحظه وليست على ادلة اكلينيكيه يعني هو اصلا ما رجعش سبب الوفاه الاساسي لاصله

يعني ما قالش الناس ماتت بسبب ايه، قال ان خلال ال 20 سنه المجموعه اللي كانت بتشرب ثلاث اكواب لبن مات منها ضعفين المجموعه اللي كانت بتشرب كوب لبن، ولم يثبت اي دليل على ان هذه الوفاه بسبب الالبان او لا.

الخلاصة ، هل الحليب سم قاتل ؟!

الخلاصه اللي انا عاوز اقولها، ان اللبن من المصادر الاساسيه لكل مراحل جسم الانسان،

ولكل مراحل اعمار الانسان، في كل مراحله وهو طفل وهو شاب وهو عجوز، امراه صغيره امراه حامل امراه مرضعه، الجميع لا يستغني عن تناول اللبن بشكل يومي لعظام قويه، ولإحتواء اللبن على الكثير من العناصر الغذائيه التي لا غنى عنها اطلاقا.

وهذا الرد على المقوله الخاطئه بكل الادله العقليه والدينيه والعلميه،

اللبن فيه سم قاتل هذه المقوله خاطئه بالمره ويجب القضاء على هذه المقوله بشكل كامل،،،

اتمنى اكون في اخر الحلقه ان اكون اضفت لكم الجديد، ولو استفدتم من المحتوى العلمي الموجود في هذه الحلقه شاركوه مع الجميع لكي ينتفع الجميع، ولا تنسوا الاشتراك في القناه، ليصلكم كل كل جديد يتعلق بالطب الرياضي واصابات الملاعب.

والسلام عليكم ورحمه الله وبركاته

من هو الدكتور محمد فتحي درويش